Кыргызстандын саламаттыкты сактоо министри Дамир Осмонов БУУнун Башкы Ассамблеясынын жол кыймылынын коопсуздугуна арналган жогорку деңгээлдеги жыйынынын расмий панелинин тең төрагасы жана модератору катары сөз сүйлөдү.

Кыргызстандын Саламаттыкты сактоо министри Дамир Осмонов Марокконун транспорт жана логистика министри Абдессамад Кайю менен биргеликте БУУнун Башкы Ассамблеясынын жол кыймылынын коопсуздугун жогорулатуу маселелери боюнча жогорку деңгээлдеги жыйынынын экинчи расмий көп тараптуу панелин өткөрдү.

Талкуунун темасы туруктуу каржылоо, ведомстволор аралык өз ара аракеттенүү жана жол коопсуздугу чөйрөсүндөгү улуттук дараметти өнүктүрүү болду.

Жыйынды ачып жатып, Осмонов жол кыймылынын коопсуздугу мамлекеттик саясаттын артыкчылыктуу багыттарынын бири болушу керектигин баса белгиледи. Анын айтымында, тиешелүү маселелерди бюджеттик пландоодо, транспорттук инфраструктураны өнүктүрүүдө, саламаттыкты сактоо тутумун жана шаар курууну өнүктүрүүдө эске алуу зарыл.

Министр мамлекеттик инвестициялардын натыйжалуулугун ишке ашырылган долбоорлордун саны менен эмес, жол-транспорт кырсыктарынын натыйжасындагы өлүмдүн жана оор жаракат алуунун азайышы менен баалоо керектигин белгиледи.

Панелдин ишине эл аралык уюмдардын, мамлекеттик органдардын, илимий коомчулуктун жана бизнестин өкүлдөрү катышты. Катышуучулар туруктуу каржылоо, институционалдык дараметти чыңдоо, эл аралык кызматташтыкты өнүктүрүү жана жол кыймылынын коопсуздугу чөйрөсүндө илимий негизделген ыкмаларды киргизүү маселелерин талкуулашты.

Талкуунун жыйынтыгы боюнча жыйынтыктоочу резюме даярдалып, ал БУУнун Башкы Ассамблеясынын жогорку деңгээлдеги жыйынтыктоочу отурумуна сунушталды.