Кыргызстандагы поликлиникаларда медициналык жардам жеткиликтүү, заманбап жана сапаттуу болушу керек. Бул Саламаттык сактоо министринин биринчи орун басары Тилек Мамадалиевдин Дүйнөлүк банктын командасы менен жолугушуусундагы негизги тема болду.

Биргелешкен долбоордун негизги багыты — үй-бүлөлүк дарыгерлерди жана поликлиникаларды камтыган медициналык жардамдын биринчи баскычын реформалоо. Тилек Мамадалиевдин айтымында, өзгөрүүлөрдүн башкы максаты — ар бир бейтап реалдуу жыйынтыкты сезиши: дарылоонун сапаты жакшырып, медициналык жардам тезирээк жана ыңгайлуураак болушу керек.

Бул үчүн Саламаттык сактоо министрлиги жана Дүйнөлүк банк төмөнкү багыттарда иш алып барууну пландап жатат:

• Санариптик кызматтарды өнүктүрүү — каттоону жана документтер менен иштөөнү жеңилдетүү;
• Дарыгерлердин жана медайымдардын квалификациясын жогорулатуу;
• Ооруканалардын жана поликлиникалардын инфраструктурасын жаңылоо — заманбап социалдык жана экологиялык стандарттарды эске алуу менен;
• Бюджеттик каражаттарды натыйжалуу пайдалануу — медициналык кызматтарды жана дары-дармектерди сатып алууга багытталган каражаттарды оптималдаштыруу.

Жолугушууда ошондой эле октябрь айында Борбордук Азия өлкөлөрү үчүн өтө турган саламаттык сактоону каржылоо боюнча ири семинарга даярдык маселеси талкууланды.

Дүйнөлүк банктын эксперттеринин Кыргызстандагы иши 28-августка чейин уланат. Бул аралыкта тараптар жабдууларды сатып алуу, санариптештирүү жана кадр саясаты боюнча чараларды деталдуу иштеп чыгышат.