Жогорку Кеңештин депутаты Жылдыз Эгенбердиева айрым дарыгерлер каржылык кызыкчылыктан улам кыргызстандыктарды орган алмаштыруу операциясына Индияга жөнөтүп жатканын билдирди. Анын айтымында, мындай операциялар Кыргызстанда да жасалат. Бул тууралуу депутат Жогорку Кеңештин Эмгек, саламаттык сактоо, аялдардын иштери жана социалдык маселелер боюнча комитетинин жыйынында айтты.

Саламаттык сактоо министринин орун басары Нурбек Букуевге кайрылган парламентарий айрым медицина кызматкерлери, негизинен жеке клиникалардын дарыгерлери, бейтаптарды чет өлкөгө жөнөтүүдөн ортомчулук акы алууга кызыкдар болушу мүмкүн экенин белгиледи.

Анын айтымында, бейтаптарга Кыргызстанда орган алмаштыруу операциялары жасалбайт же жетиштүү деңгээлде сапаттуу жүргүзүлбөйт деген түшүнүк берилүүдө. Депутат мындай көрүнүш өлкөдөгү трансплантология тармагынын өнүгүшүнө тоскоол болуп жатканын эсептейт.

Эгенбердиева Саламаттык сактоо министрлигин тиешелүү мамлекеттик органдар менен биргеликте мындай учурларды текшерүүгө жана ортомчулардын ишмердүүлүгүнө көзөмөлдү күчөтүүгө чакырды.

Мындан тышкары, депутат Индияда боорун жана бөйрөгүн алмаштырып келген кыргызстандыктардын арасында операциядан кийинки оорлошуулар болуп жатканын айтты.

Анын сөзүнө караганда, айрым бейтаптар мекенине кайтып келгенден кийин дары-дармектерди туура колдонуу боюнча жетиштүү маалымат албагандыктан, трансплантацияланган органдардын организм тарабынан четке кагылышына туш болушууда.

Тактап айтканда, сөз трансплантацияланган органдардын четке кагылышын алдын алуу үчүн зарыл болгон такролимус жана башка дары-дармектер жөнүндө болуп жатат. Депутат бейтаптар бул препараттарды кандай өлчөмдө жана канча убакыт ичүү керектигин дайыма эле биле бербей турганын белгиледи.

Эгенбердиева орган алмаштыруу операциясынан кийин кайтып келген бейтаптардын арасында трансплантацияланган органдардын четке кагылышы гана эмес, адам өлүмү менен аяктаган учурлар да катталып жатканын билдирди.

Ал мындай жарандарды медициналык жактан көзөмөлдөөнү күчөтүүнү, тиешелүү реестрге киргизүүнү жана үй-бүлөлүк медицина борборлору аркылуу туруктуу дарыгерлик көзөмөлдү камсыз кылууну сунуштады.