Жогорку Кеңештин Төрагасы Марлен Маматалиев Стамбулда Түркиянын Улуу улуттук жыйынынын төрагасы Нуман Куртулмуш менен жолугушту. Тараптар эки өлкө ортосундагы товар жүгүртүүнү 5 млрд долларга чейин жеткирүү максатын белгилешип, экономикалык жана инвестициялык кызматташтыкты арттырууну макулдашышты.

Маматалиев Кыргызстандын жарандарына түркиялык клиникаларда дарыланууга квотаны көбөйтүүнү сунуштады. Куртулмуш буга жооп катары бул маселени иштеп чыгууну убада кылып, бардык багыттар боюнча — анын ичинде маданий-гуманитардык чөйрөдө кызматташууну кеңейтүүгө даяр экенин билдирди. Ошондой эле ал республиканын парламенти тарабынан белек кылынган кыргыз боз үйү түрк парламентинин короосуна тигилгенин маалымдады.

Мындан тышкары, тараптар тармактык комитеттер жана депутаттык достук топтору деңгээлинде парламенттер аралык диалогду улантууга макулдашышты.