Кыргызстанда жашы жете элек жарандардын өлкө аймагынан тышкары убактылуу чыгуу тартибин өзгөртүүнү караган мыйзам долбоору иштелип чыкты. Документ Жогорку Кеңештин кароосуна киргизилди.

Маалыматка ылайык, мыйзам долбоору дарыланууга, олимпиадаларга, ошондой эле маданий, билим берүү жана спорттук иш-чараларга бара жаткан балдар үчүн жол-жоболорду жөнөкөйлөтүүгө багытталган.

Негиздеме-маалымкатка таянсак, учурдагы мыйзамдар ата-энесинин экөөнүн тең нотариалдык жактан күбөлөндүрүлгөн макулдугун же алардын биринин макулдугу жок болгон учурда соттун чечимин талап кылат. Иш жүзүндө бул көп учурда соттук териштирүүлөрдүн узакка созулушуна алып келет жана балдарды дарыланууга, окууга же эл аралык мелдештерге өз убагында баруу мүмкүнчүлүгүнөн ажыратат.

«Мыйзам долбоору саламаттыкты сактоо, билим берүү, маданият же спорт тармагындагы ыйгарым укуктуу мамлекеттик органдар тарабынан берилген же тастыкталган жана сапардын максатын ырастаган документтер болгон учурда, ата-энесинин биринин нотариалдык жактан күбөлөндүрүлгөн макулдугу менен баланын убактылуу чыгуусуна уруксат берүүнү сунуштайт», — деп айтылат документте.

Мындан тышкары, нотариалдык буйрук механизмин киргизүү сунушталууда. Ал экинчи ата-эне бир жылдан ашык убакыт бою алимент төлөөдөн качып жана чындыгында баланы тарбиялоого катышпаган учурларда колдонулушу мүмкүн. Мында ушундай механизм менен убактылуу чыгуу мөөнөтүн үч айга чейин чектөө сунушталып жатат.

Ошол эле учурда мыйзам долбоору уруксат берилген убактылуу чыгуу мөөнөтү аяктагандан кийин жашы жете элек баланы Кыргызстандан тышкары атайылап кармап тургандыгы үчүн кылмыш жоопкерчилигин киргизүүнү карайт. Бул үчүн Кылмыш-жаза кодексин айып пул салууну же үч жылга чейинки мөөнөткө эркинен ажыратууну караган жаңы 188¹-беренеси менен толуктоо сунушталууда. Ошондой эле Кылмыш-жаза процессуалдык кодексине, Үй-бүлө кодексине жана «Нотариат жөнүндө» мыйзамга тиешелүү өзгөртүүлөрдү киргизүү сунушталууда.

Документтин авторлору белгилегендей, сунушталып жаткан өзгөртүүлөр жашы жете электердин убактылуу гана чет өлкөгө чыгуусуна тиешелүү жана туруктуу жашоо үчүн чыгууну жол-жоболоштуруу тартибине, ошондой эле мыйзамдарда ата-энелердин милдеттүү макулдугу каралган башка учурларга тиешеси жок.

Иштеп чыгуучулардын маалыматы боюнча, мыйзамды кабыл алуу үй-бүлөлөр үчүн административдик тоскоолдуктарды жоюуга, сотторго болгон жүктөмдү азайтууга жана мамлекеттик бюджеттен кошумча чыгым кетирбестен балдардын укуктарын натыйжалуураак коргоону камсыз кылууга мүмкүндүк берет.