Эне жана баланы коргоо улуттук борборунун трансплантология бөлүмүндө дагы бир ийгиликтүү бөйрөктү көчүрүү операциясы жасалды. Бул тууралуу Саламаттык сактоо министрлиги билдирди.  

Маалыматка ылайык, бөйрөк алмаштырган 33 жаштагы бейтап 1 жыл 9 ай бою өнөкөт бөйрөк оорусунун акыркы стадиясына байланыштуу гемодиализ алып келген. Ага 44 жаштагы агасы донор болуп берген. Операция ийгиликтүү өтүп, учурда бейтаптын абалы туруктуу деп бааланууда.  Ал эми көчүрүлгөн бөйрөктүн функциясы калыбына келген.

Министрлик жалпысынан 2018-жылдан бери аталган борбордо 76 бөйрөк трансплантациясы жүргүзүлгөнүн билдирди. Алардын ичинен 2024-жылдан тарта 35 операция бюджеттик негизде акысыз жасалган.