Ата мекендик фармацевтикалык ишканалар өндүрүштү модернизациялоо жана эл аралык сапат стандарттарын киргизүү үчүн жеңилдетилген мамлекеттик каржылоого жеткиликтүүлүк алышты. Министрлер кабинетинин №472-т тескемеси менен бекитилген жаңы долбоорду ишке ашыруу механизмин Экономика министрлигинин, Саламаттыкты сактоо министрлигинин, «КР Мамлекеттик өнүктүрүү банкынын», «АБанктын» жана «Элдик Банктын» өкүлдөрү талкуулашты.

Программа жылдык 3% жана 5% чендери менен, төлөө мөөнөтү 10–12 жылга чейинки жана негизги карыз боюнча 24 айга чейинки жеңилдетилген мөөнөтү бар узак мөөнөттүү насыяларды карайт. Дары-дармек жана медициналык буюмдарды өндүрүүчүлөр бул каражаттарды цехтерди курууга жана реконструкциялоого, жогорку технологиялык жабдууларды сатып алууга, сапатты көзөмөлдөөчү лабораторияларды түзүүгө жана продукцияны милдеттүү маркалоо системаларын киргизүүгө багыттай алышат.

Долбоорду ишке ашыруу масштабдуу импорттун ордун басууга жана жарандарды сапаттуу ата мекендик дары-дармектер менен камсыз кылууга багытталган. Программага катышуу фармацевтикалык ишканаларга өндүрүштүк кубаттуулуктарын кеңейтүүгө гана эмес, тышкы рыноктордо продукциянын атаандаштыкка жөндөмдүүлүгүн жогорулатууга да мүмкүндүк берет, бул өлкөнүн дары-дармек коопсуздугун чыңдоо үчүн стратегиялык маанилүү кадам болуп саналат.