Жаратылыш газы үчүн төлөм эсептик айдан кийинки айдын 20-күнүнөн кечиктирилбестен төлөнүшү керек. Бул тууралуу «Газпром Кыргызстан» компаниясынын басма сөз кызматы билдирди.

Компания карыз толугу менен төлөнгөндөн кийин газ менен камсыздоону кайра жандандыруу үч жумушчу күнгө чейин созулушу мүмкүн экенин эскертти. Коопсуздук талаптарын сактоо үчүн газга кайра кошуу компаниянын адистеринин катышуусунда жүргүзүлөт. Жылытуу мезгилинин башталышында техникалык кызматтарга түшкөн жүк кескин көбөйүп, бул кайра кошулуу үчүн кезектердин жаралышына алып келиши мүмкүн.

Карыздын суммасын төмөнкү жолдор менен билүүгө болот:

• «Мой газ» мобилдик тиркемеси аркылуу;
• gazprom.kg расмий сайтындагы жеке кабинеттен;
• ай сайын берилүүчү квитанциядан;
• «Мой дом» мобилдик тиркемеси аркылуу;
• 4444 маалымдама кызматынын телефону аркылуу.

Газ үчүн «Мой газ», «Мой дом» тиркемелери, банктардын тиркемелери (BAKAI, MBank жана башкалар) аркылуу же абоненттерди тейлөө боюнча жакынкы кеңседен төлөөгө болот.