Кыргызстан жана Кытай Эл Республикасынын Шинжаң-Уйгур автономиялуу району (ШУАР) заманбап фитосанитардык жана токсикологиялык лабораторияларды куруу боюнча макулдашты. Тиешелүү чечим Өсүмдүктөрдүн карантини департаментинин директору Максат Кочеровдун ШУАРдын Кызыл-Суу Кыргыз автономиялуу облусунун губернаторунун орун басары Вэнь Гуанхуа менен болгон жолугушуусунда кабыл алынды.

Кытай делегациясынын курамына ШУАРдын Илим жана технологиялар башкармалыгынын жетекчилери жана Кытайдын Башкы биоинженерия лабораториясынын директору кирген. Республиканын аймагында жаңы жогорку технологиялык лабораторияларды түзүү айыл чарба продукцияларын сертификаттоо процесстерин тездетүүгө жана өз ара соода жеткирүүлөрүндө сапатты көзөмөлдөө деңгээлин жогорулатууга мүмкүндүк берет.

Айыл чарба министрлигинде белгиленгендей, долбоорду ишке ашыруу агрардык сектордогу илимий-техникалык кызматташтыкты өнүктүрүүгө жана соода-экономикалык байланыштарды тереңдетүүгө багытталган. Тараптар үзгүлтүксүз тажрыйба алмашууга, адистерди окутууга жана өсүмдүктөрдү коргоо жана карантин чөйрөсүнө интеллектуалдык технологияларды киргизүүгө даяр экендиктерин билдиришти.