Кыргызстанда мотоциклдерди, мопеддерди, скутерлерди жана башка эки же үч дөңгөлөктүү транспорт каражаттарын милдеттүү түрдө каттоо башталганга чейин мыйзамдаштыруу пландалууда. Бул тууралуу Жогорку Кеңештин депутаты Дастан Бекешев Telegram-каналында билдирди.

Анын айтымында, 2-октябрда Ички иштер министрлиги, «Унаа» мамлекеттик мекемеси, Бажы кызматы, Транспорт министрлиги жана башка мамлекеттик органдар жумушчу кеңешме өткөрүшкөн. Анда транспорт каражаттарын мыйзамдаштыруу чечими кабыл алынган. Тиешелүү жарлыктын долбоорун Ички иштер министрлиги даярдайт. Ал эми жарлыкты ишке ашыруу үчүн зарыл болгон башка чечимдерди мамлекеттик номерлерди жана айдоочулук күбөлүктөрдү берүү менен алектенген «Унаа» мамлекеттик мекемеси иштеп чыгат.

Бекешев мыйзамга ылайык, мындай транспорт каражаттары каттоодон өтүшү керектигин, бирок ага чейин жарандарга аларды мыйзамдаштырууга мүмкүнчүлүк берүү зарыл экенин түшүндүрдү. Бул мотоциклдерге, мопеддерге, скутерлерге жана башка эки же үч дөңгөлөктүү транспорт каражаттарына тиешелүү.