«Вкусно — и точка» компаниясы Бишкектеги алгачкы түйүнү жайгаша турган жерди жарыялады. Ал Чүй проспекти, 213 дарегиндеги «Россия» кинотеатрынын имаратында орун алат.

Учурда кинотеатрдын имаратында оңдоп-түзөө жана жасалгалоо иштери жүрүп жатат. Тармактын Кыргызстандагы алгачкы ишканасынын ачылышы болжолдуу түрдө 2026-жылдын аягына пландалууда.

«Вкусно — и точка» — Орусияда иш алып барган тез тейлөө ишканаларынын түйүнү. Компания күн сайын өлкө боюнча Калининграддан тартып Владивостокко чейин 2 миллиондой адамды тейлейт. Бүгүнкү күндө Орусиянын аймагындагы 67 региондо тармактын 990дон ашуун жайы ачылган. Алардын 100дөн ашыгы франшиза боюнча иштейт.

Компаниядан такташкандай, «Система ПБО» ЖЧКсы жана «Алькрест Фуд» ЖЧКсы коммерциялык концессия келишимин түзүштү. Макулдашуунун шарттарына ылайык, «Алькрест Фуд» Кыргызстандын аймагында «Вкусно — и точка» франшизасын өнүктүрмөкчү.

Жакынкы беш жылда компания республикада ар кандай тейлөө форматтарындагы 15ке чейин жай ачууну көздөөдө. Түйүндү өнүктүрүүнүн алкагында 750гө жакын жумуш орундарын түзүү пландалууда.

Жаңы франчайзи-өнөктөштүн ишканалары «Вкусно — и точка» иш стандарттарына толук жооп берип, тармактын заманбап технологияларын колдонору жана кардарларды жогорку деңгээлде тейлөөнү камсыздай турганы кабарланууда.

«Вкусно — и точканын» төрт франчайзи-өнөктөшү бар: «Развитие РОСТ» ЖЧКсы, «Региональная Сеть Предприятий Питания» ЖЧКсы, «Кавказ и Точка» ЖЧКсы, ошондой эле Кыргызстандын «Алькрест Фуд» ЖЧКсы.

2022-жылы «Вкусно — и точка» Орусиядагы McDonald’s түйүнүнүн укук мураскери болгон.