Кыргызстандын 2027-жылга карата республикалык бюджетинин долбооруна ылайык, саламаттык сактоо тутумуна каралган чыгашалар 28 млрд 250,8 млн сомду түзөт. Бул маалымат бюджеттин долбоорун кароонун жүрүшүндө айтылды.

Бул каражаттын басымдуу бөлүгү — дээрлик 24,74 млрд сому Саламаттык сактоо министрлигине караштуу медициналык мекемелердин кызматкерлеринин эмгек акысына жана социалдык чегерүүлөрүнө жумшалышы пландалууда. Дагы 36 млн сомго жакын каражат тармактагы мамлекеттик кызматкерлердин айлык акысын жогорулатууга багытталат.

2027-жылы саламаттык сактоодогу илим багыты 46,2 млн сом өлчөмүндө каржыланса, жаш адистерди колдоого багытталган «Жаш дарыгер» программасына 132 млн сом бөлүнөт.

850,7 млн сомдук өзүнчө чыгымдар блогу бир нече максаттуу багыттарды камтыйт: 339,7 млн сому «Дени сак жүрөк» кардиологиялык программасына кетет, 101 млн сомдон онкологиялык дары-дармектерге жана медициналык техникаларды, операциялык шаймандарды, керектелүүчү материалдарды сатып алууга каралган, ал эми дагы 309 млн сому Мамлекеттик кепилдиктер программасынын пилоттук бөлүгүнө чегерилген.

Эмгек акыдан кийинки эң ири берене — дары-дармектерди жана медициналык буюмдарды сатып алуу болуп саналат, буга 2,23 млрд сомдон ашык каражат каралган. Медициналык мекемелердин коммуналдык кызматтары бюджетке 194,6 млн сомго турса, Каракол шаарындагы медициналык колледжди оңдоого жана техникалык жактан жабдууга 15 млн сом бөлүнөт.

Мындан тышкары, жалпы мамлекеттик программалар жана төлөмдөр боюнча дагы 4 млрд 338,9 млн сом каралган, анын дээрлик үчтөн бир бөлүгү — 1 млрд 288,4 млн сому гемодиализ кызматтарынын акысын төлөөгө арналган.

Жалпысынан чыгымдардын түзүмү көрсөткөндөй, 2027-жылы медицинага багытталган негизги бюджеттик салымдар кадрларга, дары-дармек менен камсыздоого, ооруканалардын техникалык базасына, ошондой эле бир катар тар багыттагы мамлекеттик программаларга жумшалат.