Кыргызстандык окуучулар Жасалма интеллект боюнча III эл аралык олимпиада (IOAI 2026) алтын жана күмүш медалдарды утушту. Бул тууралуу Агартуу министрлиги билдирди.

Олимпиада 2–8-августта Казакстандын Астана шаарында өттү. Ага дүйнөнүн 106 өлкөсүнөн 400дөн ашык мектеп окуучусу катышкан. Олимпиада машиналык үйрөнүү, маалыматтар менен иштөө жана жасалма интеллект моделдерин иштеп чыгуу боюнча тапшырмаларды камтыган.

Кыргызстандын курама командасы мелдеште бир алтын, бир күмүш медаль жана бир ардак грамота жеңип алган.

• Алтын медаль: Ян Бобрус, “Газпром Кыргызстан” мектебинин 10-классынын окуучусу;
• Күмүш медаль: Сабыр Алымбеков, “Маариф” билим берүү комплексинин 10-классынын окуучусу;
• Ардак грамота: Айвар Тынчтыкбеков, “Акылман” президенттик мектебинин 9-классынын окуучусу.

Өлкөлөрдүн жалпы рейтингинде Кыргызстандын курама командасы 15-орунду ээледи. Команданы Исхак Тажибаев, Мамат Ишматов жана Артем Беляев жетектеген.