10-августта Колумбиянын батыш бөлүгүндө күчү 7,4 баллга жеткен жер титирөө болуп, 132 киши каза тапты. Буга байланыштуу өлкө президенти Абелардо де ла Эсприэлья жалпы улуттук өзгөчө кырдаал режимин жарыялады. Бул тууралуу дүйнөлүк ЖМКлар жазды.

Колумбиянын аймактык борборлор ассоциациясынын маалыматына ылайык, кырсыктын кесепетинен 570тен ашык жаран жаракат алды. Перейра, Кали жана Манисалес шаарларында 1500дөн ашык турак үй жабыркап, 60ка жакын имарат толугу менен кыйрады. Мындан тышкары, 18 оорукана жана 52 мектепке зыян келтирилген.

Колумбиянын геологиялык кызматы билдиргендей, жер титирөөнүн очогу Сан-Хосе-дель-Пальмар шаарынын жанында, 103-107 чакырым тереңдикте жайгашкан. Бул окуя өлкөдө XXI кылымда катталган эң кубаттуу жер титирөө катары бааланды.

Мамлекет башчысы куткаруу иштерине бардык институттук ресурстар мобилизацияланганын билдирди. Анын айтымында, учурда урандылардын астында калган адамдарды издөө жана куткаруу иштерине артыкчылык берилүүдө.

Ошондой эле АКШнын Мамлекеттик департаменти Колумбияга 15,5 миллион доллар өлчөмүндө чукул жардам бөлүнөрүн жарыялады.