Кыргызстандын ок атуу спорту боюнча улуттук курамасынын мүчөсү Имандос Бектенов Индияда өтүп жаткан Азия чемпионатында күмүш медаль жеңди. Бул тууралуу Дене тарбия жана спорт агенттиги билдирди.

Мелдеш 2-февралдан 14-февралга чейин Нью-Дели шаарында өтүүдө. Ага 19 өлкөдөн 385 спортчу катышып жатат. Кыргызстандын курама командасынан 16 спортчу барган.

Биринчи күндүн жыйынтыгы боюнча, 10 метрге пневматикалык тапанчадан атуу (10 m Air Pistol) көнүгүүсүндө Кыргызстандын эки спортчусу финалга чыкты. Жаштар арасында Имандос Бектенов 2-орунду ээлеп, күмүш медалга татыды. Чоңдор арасында Аскат Токмоков 7-орунду ээледи.