Бүгүн, 14-мартта президент Сооронбай Жээнбеков Коопсуздук кеңешинин жыйынын өткөрдү. Ага бардык министрлер катышты. Бул тууралуу президенттин аппаратынын маалымат кызматынан билдиришти.

Жыйында коронавируска байланыштуу өлкөдөгү экономикалык абал жана коопсуздук маселелер талкууланды.

Ошондой эле үстүбүздөгү жылдын 16-мартынан баштап, өлкөнүн бардык мектептерин жана жогорку окуу жайларын үч жумага карантинге жабуу чечими кабыл алынды. Мындай чечимге өлкө башчы кол койду.

Президент Сооронбай Жээнбеков тиешелүү мамлекеттик органдардын жетекчилеринин жеке жоопкерчилиги жөнүндө дагы бир жолу эскертти. Зарыл болгон иш-чаралар тиешелүү деңгээлде ишке ашырылбаса, эң катуу чаралар көрүлө турганын белгиледи.