Жогорку Кеңештин төрагасы Марлен Маматалиев 23-октябрда Японияга расмий сапарынын алкагында япон парламентинин Сенатынын төрагасы Масакудзу Сэкигути менен жолугушту. Ал аны Кыргызстанга расмий сапар менен келүүгө чакырды. Бул тууралуу Жогорку Кеңештин басма сөз кызматы билдирди.

Тараптар Кыргызстан менен Япониянын кызматташтыгын, анын ичинде парламенттер аралык байланыштарды чыңдоо, соода-экономикалык жана маданий-гуманитардык мамилелерди кеңейтүү маселелерин талкуулашты. Маматалиев быйыл эки өлкөнүн ортосунда дипломатиялык мамилелердин түзүлгөнүнө 34 жыл толгонун эске салды. Анын айтымында, депутаттык достук топторунун өз ара сапарлары, үзгүлтүксүз диалог жана тажрыйба алмашуу эки өлкөнүн мамилелерин жаңы деңгээлге чыгарууга жардам берет.

Төрага япон тарапка көп жылдардан бери көрсөтүп келе жаткан колдоосу үчүн, анын ичинде Япониянын Эл аралык кызматташтык агенттигинин (JICA) долбоорлору үчүн ыраазычылык билдирди. Ал тоо экосистемаларын сактоо боюнча демилгелер тууралуу айтып, келерки жылы Бишкекте өтө турган Экинчи глобалдык тоо саммитине япон делегациясы жогорку деңгээлде катышат деген үмүтүн билдирди.

Сэкигути парламенттер аралык дипломатиянын маанилүүлүгүн жана Япониянын Кыргызстан менен кызматташтыкты өнүктүрүүгө кызыкдар экенин белгиледи. Ал экономикалык, маданий жана гуманитардык тармактарды артыкчылыктуу багыттар катары атады. Ошондой эле Кыргызстанды БУУнун Коопсуздук Кеңешинин туруктуу эмес мүчөсү болуп шайланышы менен куттуктады.

Депутаттык достук топторунун жетекчилери байланыштарды чыңдоо боюнча сунуштарын ортого салышты. Жолугушуудан кийин Жогорку Кеңештин делегациясы Сенаттын ишмердүүлүгү менен таанышып, Императордук залды, жыйындар залын жана парламенттик музейди көрдү.