Кыргызстандын дүң эл аралык резервдери 2026-жылдын август айынын соңуна карата 8 945,07 млн долларды түздү. Анын ичинен ликвиддүү бөлүгү 8 869,46 млн доллар болду. Бул тууралуу Улуттук банктын маалыматтары күбөлөндүрөт.

Бир ай ичинде резервдер кыйла өстү. Июль айында дүң резервдер 8 218,50 млн долларды, ликвиддүү бөлүгү 8 143,36 млн долларды түзгөн. Демек, бир айда резервдер болжол менен 727 млн долларга көбөйгөн. Ага чейин, июнь айында, резервдер 7 923,05 млн долларга чейин төмөндөгөн.

2025-жылдын август айына салыштырмалуу өсүш дагы кыйла болду. Анда дүң резервдер 6 885,80 млн долларды түзгөн. Бир жыл ичинде көрсөткүч 2 059 млн долларга же болжол менен 30%га өстү.

Резервдердин эң жогорку көрсөткүчү 2026-жылдын январь айында катталып, 10 177,18 млн долларга жеткен. Ал эми ликвиддүү бөлүгү 10 103,35 млн долларды түзгөн. Андан кийин резервдер төмөндөй баштаган: февралда — 9 625,44 млн доллар, мартта — 8 689,03 млн, апрелде — 8 637,65 млн, майда бир аз өсүп, 8 749,65 млн доллар болгон. Июнда болсо жыл ичиндеги эң төмөнкү көрсөткүчкө — 7 923,05 млн долларга түшкөн.

Салыштыруу үчүн, 2025-жылдын башында, январь айында, дүң резервдер 5 190,86 млн долларды түзгөн. Ал эми 2025-жылдын декабрь айына карата 8 603,14 млн долларга чейин өскөн.

Reporter.kg маалымкаты: Эл аралык дүң резервдер — бул өлкөнүн борбордук банкынын көзөмөлүндө турган жана каалаган учурда колдонууга мүмкүн болгон тышкы активдердин жыйындысы. Алардын курамына чет өлкөлүк валюта, алтын, ЭВФтин атайын карыз алуу укуктары (СДР) жана башка ликвиддүү активдер кирет. Резервдер улуттук валютанын туруктуулугун сактоо, өлкөнүн төлөө жөндөмдүүлүгүн камсыздоо жана экономиканы тышкы соккулардан коргоо үчүн негизги курал болуп кызмат кылат. Резервдердин ликвиддүү бөлүгү — бул алардын кошумча чектөөлөрсүз, токтоосуз колдонула турган бөлүгү.