Улуттук банктын маалыматына ылайык, Кыргызстандын эл аралык резервдери 2026-жылдын апрель айында 8,64 млрд долларды түздү — төмөндөө ушуну менен үчүнчү ай катарынан уланууда.

Эң жогорку чек 2026-жылдын январь айында катталган — 10,18 млрд доллар. Ошондон бери резервдер 1,54 млрд долларга, же болжол менен 15%га кыскарган. Апрель айында мартка салыштырмалуу төмөндөө минималдуу болуп, 51 млн доллардын тегерегин түздү.

Ошол эле учурда, 2025-жылдын башына салыштырмалуу абал оң бойдон калууда: өткөн жылдын январында резервдер 5,19 млрд долларды түзгөн. Ошентип, акыркы айлардагы артка кетүүлөргө карабастан, 15 айдын ичинде алар дээрлик эки эсеге өскөн.

Бүтүндөй 2025-жыл бою резервдер тынымсыз өсүп келген — январдагы 5,19 млрд доллардан декабрдагы 8,60 млрд долларга чейин. Кескин секирик 2026-жылдын январында катталып — дароо 10,18 млрд долларга жеткен, андан соң акырындык менен төмөндөө башталган. Адатта дүң көрсөткүчтөрдөн бир аз артта калган резервдердин өтүмдүү (ликвиддүү) бөлүгү апрель айында 8,56 млрд долларды түздү.

Reporter.kg маалымкаты:Дүң резервдер — бул өлкөнүн борбордук банкынын карамагындагы бардык чет элдик активдердин жыйындысы. Алардын курамына чет өлкө валютасы, алтын, ЭВФтеги (Эл аралык валюта фонду) карыз алуунун атайын укуктары (СДР), өлкөнүн ЭВФтеги резервдик позициясы жана башка өтүмдүүлүгү жогору чет элдик активдер кирет.

Резервдердин өтүмдүү (ликвиддүү) бөлүгү — бул дүң резервдердин ичинен эсептешүүлөр үчүн тез арада колдонууга мүмкүн болгон бөлүгү. Ал, эреже катары, дүң резервдерден бир аз аз болот, анткени жеткиликтүүлүгү чектелген же убакытты талап кылган активдерди камтыбайт.

Резервдер мамлекетке бир нече максатта керек: улуттук валютанын курсун кармап туруу, тышкы карызды тейлөө, кризис учурунда импортту жабуу жана инвесторлордун өлкө экономикасына болгон ишенимин сактоо. Кеминде үч айлык импортту жапкан сумма резервдердин ыңгайлуу деңгээли деп эсептелет.