2026-жылы мусулмандардын ыйык Курман айт майрамы 27-майга, шаршемби күнүнө туура келет. Майрамдын алдында, 26-майда динге ишенгендер Арафа күнүн белгилешет, деп билдирди Кыргызстан мусулмандарынын дин башкармалыгы (КМДБ).

Курман айт — ислам дининдеги биримдикти, мээримдүүлүктү жана кайрымдуулукту чагылдырган эң маанилүү майрамдардын бири. Салт боюнча бул күнү Айт намазы окулгандан кийин ишенгендер курмандык чалуу жөрөлгөсүн аткарышат. Курмандыкка чалынган малдын этин муктаждарга, туугандарга жана коңшуларга таркатуу салтка айланган.

Муфтият мекендештерди келе жаткан майрам менен куттуктап, ар бир үй-бүлөгө бакубатчылык, тынчтык жана өнүгүү каалайт. Республика боюнча мечиттерде майрамдык багымдат намазына даярдыктар башталды.