Учурда кыргызстандык компаниялар чет өлкөлөр менен күйүүчү-майлоочу майларды (КММ) жеткирүү боюнча сүйлөшүүлөрдү жүргүзүп жатышат. Бул тууралуу Reporter.kg сайтына Нефтетрейдерлер ассоциациясынын президенти Канатбек Эшатов билдирди.

«Учурда биздин компаниялар Кытай, Казакстан, Беларусь жана Азербайжан менен сүйлөшүүлөрдү жүргүзүп жатат. Мындан тышкары, айрым кыргызстандык компаниялардын өкүлдөрү Европанын эки өлкөсүнө учуп кетишти. Жыйынтыгы тууралуу сөзсүз кабарлайбыз», — деди Эшатов.

Эскерте кетсек, өлкөнүн май куюучу жайларында жогорку октандуу бензиндин тартыштыгы байкалууда. Кыргызстандын Нефтетрейдерлер ассоциациясы муну пландык оңдоо иштерине жана тышкы факторлорго байланыштуу Россиянын мунайды кайра иштетүүчү заводдорунан май жөнөтүүнүн көлөмү кыскарып кеткени менен түшүндүрүүдө.

Министрлер кабинетинин төрагасынын биринчи орун басары Данияр Амангелдиев Кыргызстанда КММ тартыштыгына жол бербөө үчүн бардык күч-аракеттер жумшаларын убада кылды.

Анара Мамытова