Бишкектеги Ооруларды алдын алуу жана мамлекеттик санитардык-эпидемиологиялык көзөмөлдөө департаментинин базасында ЕЭКтин техникалык жөнгө салуу боюнча министри Александр Субботин баштаган Евразия экономикалык комиссиясынын (ЕЭК) делегациясы менен жумушчу жолугушуу болуп өттү.

Кыргызстандын Саламаттык сактоо министрлигинин басма сөз борбору билдиргендей, делегациянын курамына ошондой эле ЕЭКтин санитардык, фитосанитардык жана ветеринардык чаралар департаментинин директорунун орун басары Алмаз Давлетов жана ЕЭКтин техникалык жөнгө салуу боюнча министринин жардамчысы Кристина Ненадовец кирген.

Жолугушуунун жүрүшүндө департаменттин өкүлдөрү кызматтын ишмердүүлүгүнүн негизги багыттары, анын уюштуруу түзүмү, функциялары жана артыкчылыктуу милдеттери менен тааныштырышты. Конокторго калктын санитардык-эпидемиологиялык бакубаттуулугун камсыз кылуу жана санитардык-эпидемияга каршы иш-чараларды ишке ашыруу боюнча аткарылып жаткан иштер тууралуу айтып беришти.

Сыноо лабораторияларынын ишмердүүлүгүнө өзгөчө көңүл бурулду. Делегацияга заманбап лабораториялык инфраструктура, аналитикалык жабдуулар, колдонулуп жаткан изилдөө ыкмалары, ошондой эле лабораториялык сыноолордун жыйынтыктарынын ишенимдүүлүгүн камсыз кылган сапатты башкаруунун учурдагы системасы көрсөтүлдү.

Мындан тышкары, ЕЭК өкүлдөрү продукцияны мамлекеттик каттоо боюнча мамлекеттик кызмат көрсөтүү тартиби менен таанышты. Аларга санитардык-эпидемиологиялык экспертиза жүргүзүү, мамлекеттик каттоо жөнүндө күбөлүктөрдү жолжоболоштуруу жана Евразия экономикалык бирлигинин продукциясын мамлекеттик каттоо жөнүндө күбөлүктөрдүн Бирдиктүү реестрине маалыматтарды киргизүү процесси көрсөтүлдү.

Жолугушуунун жыйынтыгында тараптар Евразия экономикалык комиссиясы менен Кыргызстандын Саламаттык сактоо министрлигинин ортосундагы кызматташтыкты мындан ары бекемдөөнүн маанилүүлүгүн баса белгилешти.

Мындай өз ара аракеттенүү техникалык жөнгө салуу механизмдерин өркүндөтүүгө, санитардык-эпидемиологиялык көзөмөлдү өнүктүрүүгө, тажрыйба алмашууга жана ЕАЭБ мейкиндигинде продукциянын коопсуздугун жогорулатууга өбөлгө түзөрү белгиленди.