Кыргызстан «Бедел» өткөрмө пункту аркылуу кыргыз-кытай чек арасында курула турган жаңы автомобиль көпүрөсүнүн өзүнө тиешелүү бөлүгүнө болжол менен $1 млн жумшашы мүмкүн. Кыргызстандын министрлер кабинети менен Кытай Өкмөтүнүн ортосундагы тиешелүү макулдашуунун долбоору учурда Жогорку Кеңеш менен макулдашуу процедурасынан өтүүдө.

Сөз Үзөңгү-Кууш (Чоң-Үзөңгү-Кууш) чек ара дарыясы аркылуу туруктуу автомобиль көпүрөсүн куруу жөнүндө болуп жатат. Учурда бул жерде транспорттук каттам убактылуу темир көпүрө аркылуу камсыздалууда.

Жаңы көпүрөнүн узундугу 56 метр, туурасы 12 метр болот. Анын 28 метри Кыргызстандын, калган 28 метри Кытайдын аймагында жайгашат. Көпүрө III категориядагы автомобиль жолдоруна коюлган талаптарга ылайык курулат.

Макулдашууга ылайык, ар бир өлкө өз аймагындагы көпүрөнүн бөлүгүн, кирүүчү жолдорду жана тиешелүү иштерди өз алдынча каржылайт.

Көпүрөнүн жалпы болжолдуу наркы $940 миңге жакын деп бааланууда. Бирок бул акыркы сумма эмес. Так наркы долбоордук-сметалык документтер даярдалып, экспертизадан өткөндөн кийин белгилүү болот.

Долбоорду ишке ашырууга төрт-беш жыл керектелери болжолдонууда. Кыргызстан курулушка жыл сайын орто эсеп менен $200 миңдей каражат бөлүшү мүмкүн. Учурда республикалык бюджетте бул максатка конкреттүү сумма карала элек.

Жаңы көпүрө «Бедел» өткөрмө пункту аркылуу өтүүчү транспорттук каттамдын бир бөлүгү болот. Кыргыз тараптан ага курулуп жаткан Барскоон — Бедел автожолу алып барат. Бул багытта тоннелдерди, ондогон көпүрөлөрдү жана башка инженердик курулмаларды куруу да каралган.

Долбоордун негизги максаты — Кыргызстан менен Кытайдын ортосундагы транспорттук байланышты өнүктүрүү, жүк жана жүргүнчү ташуу үчүн туруктуу шарттарды түзүү жана «Бедел» өткөрмө пунктунун инфраструктурасын жакшыртуу.