Кытайдан ташылып келе жаткан 25 тоннадан ашык картошка өлкөгө киргизилбестен, кайра артка кайтарылды. Бул тууралуу Айыл чарба министрлиги билдирди.

Маалыматка ылайык, «Эркечтам» көзөмөл өткөрүү пунктунда жүргүзүлгөн текшерүү учурунда аталган жүктүн фитосанитардык сертификаты талаптарга жооп бербей тургандыгы аныкталган.

“Кыргызстандын «Өсүмдүктөрдүн карантини жөнүндө» мыйзамынын жана Евразия экономикалык бирлигинин комиссиясынын № 318 чечиминин талаптарына ылайык, продукция Кыргызстандын аймагына киргизилген жок жана кайра артка кайтарылды”,-деп айтылат маалыматта.