Бокс боюнча оор салмактагы дүйнөнүн мурдагы чемпиону Майк Тайсон мурдагы дүйнө чемпиону Флойд Мейвезер менен беттешүү үчүн келишим түздү. Бул тууралуу чет элдик спорт басылмалары кабарлашты.

Маалыматка ылайык, беттеш CSI Sports/Fight Sports тарабынан уюштурулуп, болжол менен 2026-жылдын жаз айында өтөт. Так датасы жана өтүүчү орду азырынча белгиленген жок.

Эске салсак, Майк Тайсон акыркы жолу америкалык блогер жана мушкер Жейк Пол менен 2024-жылдын 14-ноябрында беттешип, чечим менен утулган. Ал эми 48 жаштагы Флойд Мейвезер 2024-жылдын августунда Жон Готти III менен беттешип, сегиз раунддан кийин жеңүүчү аныкталбай аяктаган.