Мамлекет тарабынан үй шартында өпкөнү жасалма желдетүүгө муктаж балдарга медициналык жабдууларды жана чыгымдалуучу материалдарды сатып алууга каражат бөлүндү. Бул тууралуу Саламаттык сактоо министрлиги билдирди.

Мекеменин маалыматында, анын алкагында 8 бала үй шартында колдонулуучу өпкөнү жасалма желдетүүчү аппараттар менен камсыздалды. Дагы 9 балага бир жылдык мөөнөткө жете турган трахеостомиялык түтүкчөлөр, фильтрлер жана башка зарыл медициналык буюмдар берилди. Б

Министрлик буга чейин ата-энелер бул кымбат баалуу жабдууларды өз алдынча сатып алууга же кайрымдуулук фонддоруна кайрылууга мажбур болушканын билдирди.

7-августта саламаттык сактоо министри Дамир Осмонов Биринчи балдар хосписине барып, бейтап балдар жана алардын ата-энелери менен жолугушкан. Министр бул категориядагы балдарды колдоо туруктуу негизде сакталарын жана үй шартында дарылануу үчүн бардык шарттар түзүлөрүн белгилеген. Ата-энелер өлкө башчысына көп жылдык көйгөйдү чечип бергени үчүн ыраазычылык билдиришкен.