«Менин шаарым» мобилдик тиркемесинде жаңы «Түнкү каттамдар» функциясы ишке кирди. Эми колдонуучулар Бишкекте түнкү убакта каттаган автобустар тууралуу маалыматты оңой ала алышат.

«Санариптик технологиялар борбору» муниципалдык ишканасы билдиргендей, жаңы бөлүмдө түнкүсүн каттаган бардык автобус каттамдары көрсөтүлгөн. Учурда №3, 13, 16, 19, 35, 45 жана 55 автобустары түнкү каттамдарды аткарат.

Жаңы функция түнкүсүн үйүнө кайткандарга, түнкү нөөмөттө иштегендерге, жакындарын тосуп же узаткандарга, ошондой эле борбор калаанын конокторуна жолун алдын ала пландаштырууга жардам берет.

Кызматты колдонуу үчүн «Менин шаарым» тиркемесин ачып, «Транспорт» бөлүмүнө өтүп, «Түнкү каттамдар» бөлүмүн тандоо жетиштүү.