Августтун аягында жана сентябрдын башындагы узак эс алуу күндөрүнүн алдында Бишкек мэриясы шаар тургундарына Кыргызстан боюнча жана анын чегинен тышкары туристтик сапарларга сунушталган арзандатуулардан пайдаланууну сунуштады. Муниципалитеттин маалыматына ылайык, бир катар туроператорлор уюштурулган турлар жана экскурсиялык программалар үчүн 15 пайызга чейин арзандатууларды даярдашкан.

Мэриянын маалыматына караганда, узак эс алуу күндөрү үй-бүлө менен убакыт өткөрүүгө, күнүмдүк чөйрөнү алмаштырууга жана Кыргызстандын, ошондой эле коңшу өлкөлөрдүн жаратылыш жана маданий кооз жерлери менен таанышууга жакшы мүмкүнчүлүк түзөт.

Сунушталган багыттардын катарына Ош, Арсланбап, Сары-Челек, Баткен, Тулпар-Көл, ошондой эле Алматы, Ташкент жана Түркстан кирет. Каалоочулар үчүн турларды брондоо боюнча байланыш маалыматтары көрсөтүлгөн туристтик компаниялардын тизмеси жарыяланды.

Эскерте кетсек, буга чейин президенттин басма сөз катчысы Аскат Алагөзов Бишкек шаарынын тургундарын ШКУнун саммитине жана VI Дүйнөлүк көчмөндөр оюндарынын ачылыш аземине байланыштуу 30–31-август жана 1-сентябрь күндөрү мүмкүнчүлүк болсо борбордон сырткары өткөрүүгө чакырган. Ошондой эле ал мектептер менен жогорку окуу жайларында окуу 15-сентябрда башталарын белгилеп, «1-сентябрга чейин Бишкекке шашылыш кайтып келүүнүн зарылдыгы жок» деген. Эми болсо мэрия узак эс алуу күндөрүнө карата туристтик компаниялардын арзандатылган сунуштарын жарыялады.