Бишкек шаардык ички иштер башкармалыгы Жогорку Кеңештин депутаты Эльдар Сулайманов мурдагы жубайына зомбулук көрсөтүп келгени айтылган окуя боюнча расмий маалымат берди.

Милициянын маалыматында, аталган факт катталып, тергөөгө чейинки текшерүү иштери башталды. Ал эми депутаттын мурдагы жубайына коргоо ордери берилди.

“Бул факт борбор калаанын милициясынын жетекчилигинин көзөмөлүндө турат. Кошумча маалымат кийинчерээк берилет”,- деп билдирди Бишкек ШИИБ.

Буга чейин Тредс соцтармагынын колдонуучусу Асел Азаматова депутат Эльдар Сулаймановдун мурдагы жубайы экенин жана ал тарабынан бир нече жолу сабалып, зомбулук көрүп келгенин билдирген. Эльдар Сулайманов бул билдирүү боюнча комментарий бере элек.