Ысык-Көл облусунда масштабдуу модернизациялоонун биринчи этабынан кийин, мурдагы «Кыргыз деңизи» санаторийинин базасында түзүлгөн «Кыргызалтын Резорт» ден соолукту чыңдоо борбору ишин баштады.

Объект президент Садыр Жапаровдун тапшырмасы менен 2025-жылы «Кыргызалтын» ААКсынын башкаруусуна өткөрүлүп берилген. Ал тоо-кен тармагынын кызматкерлеринин эс алуусун жана ден соолугун чыңдоону уюштуруу үчүн модернизацияланды.

Реконструкциялоо учурунда башкы корпус, инженердик тармактар, мейманкана бөлмөлөрү жана борбордун аймагы толугу менен жаңыланды. Комплекс жаңы эмеректер жана заманбап жабдуулар менен камсыздалды. Ошондой эле узундугу 205 метр болгон жаңы пирс пайдаланууга берилип, 2009-жылдан бери иштебей турган ачык бассейн кайрадан ачылды. Учурда эл аралык деңгээлдеги көп функционалдуу спорт комплексинин курулушу уланууда.

1975-жылы негизделген «Кыргыз деңизи» санаторийи көп жылдар бою өлкөнүн ири ден соолукту чыңдоочу жайларынын бири болуп келген. Реконструкциядан кийин ал жаңы аталыш менен — «Кыргызалтын Резорт» катары ишин жандантты.