Пакистандын куралдуу күчтөрү Ооганстандын Кунар жана Гильменд провинцияларындагы калктуу конуштарга түн ичинде абадан сокку урду. Ооганстандын бийлиги кеминде 9 адам каза болуп, дагы 11 адам жаракат алганын билдирди.

Бул тууралуу 1-октябрда, бейшемби күнү, Ооганстан өкмөтүнүн расмий өкүлү Забихулла Муджахид X социалдык тармагында жазды. Анын айтымында, Пакистандын аскердик авиациясы Кунар провинциясынын Шултан районундагы Чугам жана Гильменд провинциясынын Гармсер районундагы Сафар айылдарындагы турак үйлөргө бомба таштаган.

Каза болгондордун арасында аялдар жана балдар бар. Үч үй талкаланганы айтылды.

«Биз бул аракетти айыптайбыз жана аны жалпы таанылган бардык принциптерди бузган агрессия жана кылмыш деп эсептейбиз», — деп айтылат Муджахиддин билдирүүсүндө.

Пакистан тарап окуянын башкача версиясын билдирди. Пакистандын Маалымат министрлиги соккулар куралдуу топтор колдонгон эки базага жасалганын жана алдын ала маалымат боюнча, анын натыйжасында 22 согушкер жок кылынганын билдирди.

Пакистан бул соккуларды Исламабад «Фитна аль-Хавараж» жана «Фитна аль-Хиндустан» деп атаган топторго каршы жүргүзүп жаткан «Газаб лил Хак» аттуу чек ара аралык аскердик операциясынын уландысы деп атады. Пакистан бийлиги өлкөгө болгон коркунуч дал Ооганстандын аймагынан келип жатканын да билдирди.

Соккулар коңшу эки өлкөнүн ортосунда үч айга созулган салыштырмалуу тынчтыктан кийинки чыңалуунун күчөшүнүн бир бөлүгү болду.

Исламабад Кабулду Пакистандын аймагына чек ара аркылуу кол салууларды жасап жаткан куралдуу топторго баш калкалоочу жай берүүгө айыптап келет. Бирок Ооганстан бул айыптоолорду четке кагып, согушкерлер маселеси Пакистандын өзүнүн ички иши экенин билдирүүдө.

Буга чейин Ооганстандын Пактия жана Нангархар провинциялары менен Пакистандын Куррам округунун ортосундагы чек ара аймагында миномёт жана артиллерия колдонулган куралдуу кагылышуулар болгон.