Непалда кыйратуучу суу ташкындарынан кийин масштабдуу куткаруу иштери уланууда. Кеминде 464 адам каза болуп, миңге жакыны дайынсыз болууда, алардын арасында 500дөн ашуун чет өлкөлүк бар. Бул тууралуу БУУнун өкүлдөрү билдиришти.

Өлкөнүн көптөгөн аймактары тышкы дүйнө менен байланышы үзүлгөн бойдон калууда. Ал жактарга жардам тик учактар менен жеткирилүүдө. Куткаруу иштерине 30 миңден ашуун аскер кызматкери жана коопсуздук күчтөрүнүн өкүлдөрү катышууда.

БУУнун Непалдагы координатору Лила Питерс Яхиянын айтымында, кыйроолордун масштабы абдан чоң. Атап айтканда, 40 чакырымга жакын жол жабыркаган.

БУУнун Кырсыктардын тобокелдигин азайтуу башкармалыгынын башчысы Камал Кишор болгон окуяны Непалдын заманбап тарыхындагы эң ири кырсык деп атады. Тоолуу аймактарда жаңы жер көчкү жана суу ташкындарынын коркунучу сакталууда.

Кызыл Кресттин Эл аралык федерациясынын алдын ала маалыматы боюнча, табигый кырсыктан 93 миңге жакын адам жабыркаган. Айрым аймактарга азыркыга чейин жетүү мүмкүн болбой жаткандыктан, келтирилген зыяндын толук көлөмүн баалоо азырынча мүмкүн эмес.

Балдардын абалы өзгөчө оор бойдон калууда. ЮНИСЕФтин маалыматы боюнча, кеминде 17 миң балага шашылыш жардам керек, ал эми 10 миңге жакын бала азырынча окуусуна кайтып келе албайт.

Суу ташкындарынан алты медициналык мекеме да жабыркап, сегиз медицина кызматкери дайынсыз болууда. Дүйнөлүк саламаттык сактоо уюму таза суу жана санитария көйгөйлөрү жугуштуу оорулардын жайылуу коркунучун күчөтөрүн эскертүүдө.