Ош шаарында Салижан Жигитов атындагы 1 миң 200 орундуу мектептин курулушу толугу менен аяктады. Имарат эки нөөмөттө 2500дөн ашык окуучуну окутууга ылайыкталган. Бул тууралуу Курулуш министрлиги билдирди.

Мектептин курулушу 2026-жылдын март айында башталган. Ал президент Садыр Жапаровдун тапшырмасы менен мамлекеттик бюджеттин эсебинен курулган.

Төрт кабаттуу жаңы окуу жай беш блоктон турат, анын жалпы аянты 13 миң 610 чарчы метрди түзөт. Имаратта окуу класстары, лабораториялар, китепкана, ашкана, эмгек жана компьютердик класстар, дарыгердин бөлмөсү, жыйындар жана спорт залдары жайгашкан. Аймакта футбол, волейбол жана баскетбол аянтчалары курулган.

Учурда объектте окуу жараянын баштоого даярдыктар көрүлүп жатканы айтылды.