Ош шаарынын Жибек жолу аймагында 101 жана 111-көчөлөрдүн 2 чакырымдан ашык бөлүгү капиталдык оңдоп-түзөөдөн өтүп, пайдаланууга берилди. Бул тууралуу Ош мэриясы билдирди.

Жолдун туурасы 18 метрди түзөт. Курулуштун алкагында жолдун эки тарабына ирригациялык лотоктор жана жөө жүргүнчүлөр үчүн тротуарлар салынып, аймак жашылдандырылган. Жолдун ачылыш аземине Ош шаарынын мэри Жанарбек Акаев, жергиликтүү депутаттар жана шаар тургундары катышкан.

Мындан тышкары Жибек жолу муниципалдык аймактык башкармалыгында дагы 15 ички көчө оңдолуп, пайдаланууга берилди. Жолдордун узундугу 10 чакырымдан ашык. Бул көчөлөр кош каржылоо долбоорунун алкагында оңдоодон өттү. Долбоордо жалпы 20 көчөнү оңдоо каралган.