Кыргызстанда Жогорку Кеңештин Регламентинде кезектеги президенттик шайлоонун жаңы датасын — январдын төртүнчү шаршембисин бекитүү сунушталууда. Тиешелүү мыйзам долбоорун парламенттин депутаттарынын тобу иштеп чыккан.

Учурда Регламентте президенттин кезектеги шайлоосу мамлекет башчысынын ыйгарым укуктары аяктаган жылдын октябрь айынын үчүнчү жекшембисинде өткөрүлөрү көрсөтүлгөн. Шайлоону Жогорку Кеңеш добуш берүү күнүнө төрт айдан кечиктирбестен дайындайт.

Депутаттар октябрдын үчүнчү жекшембисин январдын төртүнчү шаршембисине алмаштырууну сунуштап жатышат. Бул норманын калган бөлүгү өзгөртүлбөйт.

Ошол эле учурда президенттик шайлоону өткөрүүнүн жаңы мөөнөтү мыйзамдарда буга чейин эле бекитилген. 2026-жылдын 28-июлунда президентти жана Жогорку Кеңештин депутаттарын шайлоо жөнүндө мыйзамдарга өзгөртүүлөрдү киргизген конституциялык мыйзам кабыл алынган. Ага ылайык, президенттин кезектеги шайлоосу иштеп жаткан мамлекет башчысынын ыйгарым укуктары аяктаган жылдын январь айынын төртүнчү шаршембисинде өткөрүлөт.

Мындан тышкары, эгер шайлоо жумуш күнүнө туш келсе, добуш берүү күнү дем алыш күн деп жарыяланат. Ошол эле учурда иш берүүчүнүн менчигинин түрүнө карабастан, кызматкерлердин эмгек акысы кадимки жумуш күнүндөгүдөй сакталат.

Авторлор бул өзгөртүү мыйзамдардагы карама-каршылыкты жоюу үчүн керек экенин түшүндүрүшөт. Июль айында шайлоо мыйзамдарына өзгөртүү киргизилгенден кийин парламенттин Регламентинде мурдагы дата — октябрдын үчүнчү жекшембиси — өзгөртүлбөй калган. Эми аны жаңы датага алмаштыруу сунушталууда.

Мыйзам долбоорун депутаттар Марлен Маматалиев, Гуля Акимбаева, Медер Алиев, Таалайбек Сарыбашов, Бекмурза Эргешов, Айбек Алтынбеков, Мейкинбек Алымбеков жана Улан Сариев даярдашкан.