Кыргызстандын Жарандарды чет өлкөдө ишке орноштуруу борбору Ош шаарында жапон тили боюнча акысыз курска кабыл алуу башталганын маалымдады.

Программа 18 жаштан 30 жашка чейинки жарандар үчүн 30 орунга эсептелген. Окутуу 4 айга созулуп, сабактар күн сайын саат 09:00дөн 17:00гө чейин өтүлөт. Катышуучулар тилди баштапкы баскычтан N4 деңгээлине чейин өздөштүрүшөт. Окуу күндүзгү форматта болгондуктан, аны жумуш же башка окуу менен айкалыштырууга тыюу салынат.

Катышуучуларга төмөнкү шарттар каралган:

• Окутуу жана окуу материалдары акысыз;
• Түшкү тамак жана жеңил тамактар берилет;
• Курулуш техникаларын иштетүү көндүмдөрү окутулат;
• Курс аяктаганда сертификат тапшырылат.

Курсту бүтүргөндөр тил деңгээлин аныктоочу JLPT экзаменине даярдануу, Жапониядагы тил мектептеринен билим алууну улантуу жана аталган өлкөдө ишке орношуу мүмкүнчүлүктөрүн караштыра алышат. Ишке орношуу кепилденбейт, ал талапкердин тил билүү деңгээлине жана иш берүүчүлөрдүн талаптарына жараша болот.

Арыздар 2026-жылдын 20-сентябры саат 18:00гө чейин кабыл алынат. Курс 29-сентябрда башталат. Дареги: Ош шаары, Амир-Тимур көчөсү, 9А.