Ош облусунун аймагында мыйзамсыз иштеген эки майнинг ишкана (криптовалюта өндүрүү) аныкталды. Бул тууралуу Улуттук коопсуздук мамлекеттик комитетинен билдиришти.

Атайын кызматтын маалыматы боюнча, аталган майнинг фермалар Кара-Суу менен Ноокаттын аймагынан табылган. Алар расмий каттоого турбай, милдеттүү сертификат албастан, мамлекетке каттоо үчүн жана башка төлөм-жыйымдарды төлөбөстөн ГЭСтерден чыккан электр энергияны пайдаланып иштеп келген. Эми майнинг фермалар колдонуп келген электр энергия калкка берилери кабарланды.

Ошондой эле майнинг ферманын ишин уюштуруу үчүн колдонулган 900дөн ашык жабдык алынган.

Учурда бул ишке катышы бар бардык адамдарды, мамлекетке келтирилген зыяндын өлчөмүн аныктоо иштери жүрүүдө.