Ош шаарында Нооруз майрамы салтанаттуу белгиленип жатат. Иш-чаралар эртең менен сүмөлөк жасоо фестивалы менен башталып, андан соң борбордук аянтта «Нооруз — 2023» деп аталган салтанат тартууланды.
Мэриядан билдиришкендей, иш-чарага Министрлер кабинетинин төрагасынын орун басары Бакыт Төрөбаев, мэр Бакытбек Жетигенов, шаардык кеңештин төрагасы Салман Назылбеков, мекеме-ишканалардын жетекчилери, шаардык кеңештин депутаттары, калаа тургундары жана коноктор катышты.
Бакыт Төрөбаев майрамга келгендерди Нооруз менен куттуктап, жалпы журтка токчулук, тынчтык каалады.
Иш-чара чоң концерттик программа менен коштолуп, театралдаштырылган оюн-зоок тартууланды.
Ошондой эле, аянтта кол өнөрчүлөрдүн көргөзмөсү болуп, спорттук мелдештер уюштурулду.
Белгилей кетсек, маданий иш-чара кечки саат 19:00дө Алымбек Датка эс алуу багында улантылат.
Биздин Телеграм каналыбызга катталыңыз
