2026-жылдын 26-сентябрында Жаңы-Пахта айылындагы «Кыргызмамасылтукумзавод» ишканасынын аймагында Кыргыз Республикасынын Министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жайы министри Эрлист Акунбековдун катышуусунда иш-чара өтет. Анда айыл чарба тармагындагы бир катар долбоорлордун ишке ашырылышы тууралуу маалымат берилет.

Эт өндүрүшүн көбөйтүү артыкчылыктуу багыттардын бири бойдон калууда — Кыргызстанда эт өндүрүшүн арттыруу, ички рынокту ата мекендик продукция менен камсыз кылуу жана өндүрүштүн өздүк наркын төмөндөтүү боюнча иштер жүргүзүлүүдө.

Калкты эт менен камсыз кылуу жана бааларды турукташтыруу максатында мамлекет бир катар чараларды көрүүдө. «Кыргыз Агрохолдинг» ААК аркылуу эттин килограммы 680 сомдон сатылып жаткан 10 соода павильону буга чейин эле иштеп жатат, ошондой эле дагы 100 павильон ачуу боюнча иштер жүрүүдө. Букачарларды товардык салмакка чейин бордоп семиртип, андан кийин этти жеткиликтүү баада сатуу механизми каралууда. Ошондой эле асыл тукум мал сатып алуу үчүн жылдык 3% үстөк менен жеңилдетилген насыялар берилүүдө, Чүй облусунда эт өндүрүү багыты боюнча фермерлерди кластердик каржылоо ишке ашырылууда, ал эми мамлекеттик фонддун жерлери тоют даярдоо үчүн эт жана сүт багытындагы асыл тукум чарбаларга берилүүдө. Мындан тышкары, эт багытындагы малдын, анын ичинде абердин-ангус породасынын башын көбөйтүүгө өзгөчө колдоо көрсөтүлүүдө.

Иш-чаранын жүрүшүндө «Кыргыз Агрохолдинг» ААК тарабынан ишке ашырылып жаткан жана калкты сапаттуу жана жеткиликтүү эт менен камсыз кылууга багытталган социалдык маанидеги долбоорлор тууралуу толук маалымат берилет.