Ош шаарында 22-октябрда эртең менен чыккан өрттүн кесепетинен 34 жаштагы аял жана анын беш баласы каза болду. КР Өзгөчө кырдаалдар министрлиги кырсык боюнча жаңы маалымат жарыялады.

Маалыматка ылайык, үйдө оңдоо иштери жүрүп жаткан жана аба ырайынын сууктугуна байланыштуу электр жылыткычы иштетилген. Алдын ала божомол боюнча, өрт ошол жылыткычтан тутанган болушу мүмкүн.

Куткаруучулардын айтымында, үйдүн ээси — каза болгон аялдын күйөөсү — учурда Түштүк Кореяда эмгектенип жүргөн.

Өрт чыккан учурда үйдө аял жана анын 13, 11, 9, 6 жана 2 жаштагы балдары болгон. Баарынын жансыз денелери өрт өчүрүүчүлөр жеткенче табылган.

Өрттүн келип чыгуу себеби боюнча териштирүү иштери уланууда.