Оштогу чыр-чатак учурунда кулпунайы талкаланган дыйканга шаардын жаңы базарынан расмий түрдө соода кылуучу орун берилди. Бул тууралуу калаа мэриясынын басма сөз кызматы билдирет.

Буга чейин социалдык тармактарда дыйкан менен сатуучулардын ортосундагы чыр-чатак тартылган видео тараган. Дыйкан өзү өстүргөн кулпунайын сатуу үчүн келген. Мэриянын маалыматы боюнча, башка сатуучулар ага кол салып, сабап, ал эми кулпунайын жолго чачып салышкан.

Түштүк борбордун мэри Жанар Акаев кырдаалды жеке көзөмөлүнө алды. Ал жабыркаган ишкер (дыйкан) менен жолугушуп, базардагы өз билемдикке карата шаар бийлигинин позициясын билдирди.

Акаев мэрия ата мекендик айыл чарба өндүрүүчүлөрүнүн укуктарын ар тараптан коргоорун, ал эми базарды мыйзамсыз ыкмалар менен монополиялаштыруу аракеттерине бөгөт коюларын билдирди. Анын айтымында, зомбулук көрсөткөн жана бирөөнүн мүлкүн талкалаган бардык адамдардын аракеттерине укуктук баа берилет.