Travel & Tourism Economic Impact Research 2026 изилдөөсүнүн маалыматы боюнча, Борбордук Азия дүйнөдөгү эң тез өсүп жаткан туристтик аймак болуп калды.

2025-жылы туризмдин аймактын ИДПсына (Ички дүң продуктусуна) кошкон жалпы салымы 17,7%га, ал эми тармактын түз салымы 19,6%га өскөн. Негизги көрсөткүчтөрдүн бири туристтик кызмат көрсөтүүлөрдү экспорттоо болду.

Өткөн жылы Борбордук Азия өлкөлөрү эл аралык туризмден 9,9 млрд доллар киреше тапкан, бул бир жыл мурункуга салыштырмалуу 26,4%га көп. Ошол эле учурда бул сумманын дээрлик жарымы — 4,8 млрд доллары — Өзбекстанга туура келген. Ал туристтик кызмат көрсөтүүлөрдү экспорттоо көлөмү боюнча аймакта лидер болду.

Дүйнөлүк саякат жана туризм кеңешинин (WTTC) баалоосу боюнча, Өзбекстан Борбордук Азия өлкөлөрүнөн келген саякатчылар арасында да эң популярдуу багыт болгон. Аймактык туристтик сапарлардын 25%ы ага туура келген.

Андан кийин Казакстан (23%), Кыргызстан (18%), Орусия (16%) жана Түркия (6%) турат.

Эксперттер Өзбекстандын лидерлигин туристтик инфраструктураны активдүү өнүктүрүү, виза режимин жөнөкөйлөтүү, транспорт тармагын модернизациялоо жана Самарканд, Бухара, Хива, Ташкент сыяктуу туристтик борборлорду эл аралык рынокто илгерилетүү менен байланыштырышат.

Изилдөөдө белгиленгендей, аймактын тургундарынын көбү Борбордук Азиянын ичинде саякаттоону артык көрүшөт.

Аналитиктердин пикиринде, чек арадан өтүүнү жөнөкөйлөтүү, аба каттамдарын өнүктүрүү, трансчегаралык туристтик каттамдарды түзүү жана аймакты бирдиктүү туристтик багыт катары биргелешип илгерилетүү тармактын кошумча өсүшүн камсыздай алат.

WTTC баяндамасына ылайык, 2025-жылы Борбордук Азиянын туризм тармагындагы бардык чыгымдардын 64,3%ы чет элдик саякатчыларга туура келген, ал эми 35,7%ын ички туризм камсыз кылган. Ошол эле учурда чет элдик коноктордун 84,5%ы эс алуу максатында, ал эми 15,5%ы иш сапары менен келишкен.

Дүйнөлүк саякат жана туризм кеңешинин божомолу боюнча, 2036-жылга чейин туризм тармагынын Борбордук Азиянын экономикасына кошкон жалпы салымы 29,7 млрд долларга жетет.