Жогорку Кеңештин регламентинде шайлоочулар менен иштөө механизми так жазылган эмес. Бул тууралуу депутат Бактыбек Сыдыков парламент жыйынында билдирди.
Белгилей кетсек, депутаттар Жогорку Кеңештин регламентинин долбоорлорун талкуулап жатышат.
Анын айтымында, шайлоочулар менен иштөө мөөнөтүн аныктоо зарыл. Депутат белгилегендей, эл өкүлү шайланган аймактагы бардык айыл өкмөттөрдү кыдырып чыгууга бир жума аздык кылат.
«Айрым депутаттардын 13 айыл өкмөтү бар, шайлоочу депутаттарды күтүп жатат. Мисалы, күзүндө шайлоочулар менен октябрдын акыркы жекшембисинен ноябрдын биринчи жекшембисине чейин, кышында — декабрдын акыркы жекшембисинен январдын биринчи жекшембисине чейин жана башкалар менен иштөөгө болот. Июль айында мен депутаттардын эс алуу күндөрүн кыскартууну сунуштайм. Маселен, сессия 15-июлда аяктап, ошол күндөн баштап шайлоочулар менен иштеп, август айында эс алууга чыгыш керек», — деди Бактыбек Сыдыков.
Депутат Марлен Маматалиев Конституцияда депутаттардын сессиясы сентябрдан июнь айына чейин созулат деп жазылып, июль айы шайлоочулар менен иштөөгө берилген деп жооп берди.
«Биздин чечимибиз менен биз каалаган убакта шайлоочулар менен иштөөгө кете алабыз. Биз шайлоочулар менен иштөө күндөрүн узарта алабыз», — деди Марлен Маматалиев.
