Бүгүн, 28-октябрда, Казакстандын Астана шаарында өтүп жаткан спорттук күрөш боюнча Дүйнө чемпионатында кыргызстандык балбан айым Айпери Медет кызы коло медаль үчүн таймашка чыгат. Анын атаандашы монголиялык Даваанасан Энх-Амар болот. Бул тууралуу Дене тарбия жана спорт агенттиги билдирди.

Медет кызы 76 килограммга чейинки салмакта күч сынашууда. Ал 1/8 финалда египеттик Самар Хамзаны таза жеңиш (туше) менен утуп алган. Чейрек финалда австриялык Мартина Кюнц менен күрөшүп, 3:3 эсебинде акыркы упайдын артыкчылыгы менен жеңишке жеткен. Ал эми жарым финалдык беттеште индиялык Кажал Кажалга 7:10 эсебинде жеңилген.

Коло медаль үчүн беттештер бүгүн, 28-октябрда, Бишкек убактысы боюнча саат 19:30да башталат.