Таш-Көмүр шаарында бала бакчанын жер тилкесинин мыйзамсыз менчикке өткөрүлүшү боюнча кылмыш иши козголду. Бул тууралуу Башкы прокуратурадан билдиришти.

Шаардык прокуратура жүргүзгөн текшерүүдө мэриянын жооптуу кызмат адамдары “Мишутка” балдар бакчасына таандык 3 млн 500 миң сомдук 17,17 сотых жерди жеке менчикке мыйзамсыз берип жиберишкендиги аныкталган.

Аталган факт боюнча Кылмыш-жаза кодексинин 337-беренеси (кызматтык абалынан кыянаттык менен пайдалануу) менен кылмыш иши козголуп, тергөө иштерин жүргүзүү шаардык милицияга тапшырылды.

Учурда бала бакчанын жер тилкесин кайтаруу боюнча иштер жүргүзүлүүдө.