Мамлекеттик салык кызматы IT-сектор жана креативдүү индустрия өкүлдөрүнүн ишин жеңилдетти. Эми Жогорку технологиялар паркынын (ЖТП) жана Креативдүү индустриялар паркынын (КИП) резиденттерин салыктык каттоодон өткөрүү жана аларды атайын салык режимине өткөрүү жараяны маалыматтык системаларды интеграциялоо аркылуу автоматтык түрдө ишке ашат.

Ишкер резидент статусун алары менен, тиешелүү парктын дирекциясы Мамлекеттик салык кызматына электрондук билдирүү жөнөтөт. Ушул маалыматтардын негизинде салык кызматынын системасы бардык керектүү процедураларды өзү жүргүзөт. Резиденттик статус токтотулган учурда да маалыматтар ушундай эле тартипте жаңыртылып турат.

Бул жаңылыктын башкы артыкчылыгы — кагазбаздыктан толугу менен баш тартуу болуп саналат. Салык төлөөчүлөргө мындан ары мамлекеттик органдарга жеке баруунун же арыздарды кол менен тапшыруунун кереги жок. Бул ашыкча административдик тоскоолдуктарды четтетип, бизнестин убактысын үнөмдөйт жана жеңилдетилген салык режиминде ишти тезирээк баштоого мүмкүндүк берет.