Президент Садыр Жапаров президенттик аппараттын мурдагы жетекчиси Фарид Ниязовго ырайым кылды. Бул маалыматты Reporter.kg редакциясына мамлекет башчысынын администрациясындагы булактар тастыкташты.

Учурда башка чоо-жайы тууралуу кабарлана элек.

Фарид Ниязов — Кыргызстандын президенттик аппаратынын мурдагы жетекчиси, экс-президент Алмазбек Атамбаевдин тарапташы.

Ал ар кайсы жылдары мамлекеттик түзүмдөрдө иштеген, журналистика менен алектенген, Алмазбек Атамбаевдин кеңешчиси, андан кийин президенттик аппараттын жетекчиси болгон. 2017-жылдын декабрында Ниязов Сооронбай Жээнбековдун президенттиги учурунда президенттик аппараттын жетекчиси болуп дайындалып, 2018-жылдын мартында кызматынан бошотулган.

Ал Кой-Таш окуяларынан кийин, 2019-жылдын 8-августунан бери камакта отурат.

Бишкектин Биринчи Май райондук соту аны бир катар беренелер, анын ичинде массалык башаламандыктар, бийлик өкүлүнө карата коркунуч же зомбулук көрсөтүү, барымтага алуу жана башка эпизоддор боюнча күнөөлүү деп тапкан.

Сот Ниязовду жалпы тартиптеги колонияда жазасын өтөө менен 7 жыл 8 айга эркинен ажыраткан, ошондой эле үч жыл бою мамлекеттик кызматтарды ээлөө укугунан ажыраткан.

2025-жылдын 23-октябрында Бишкек шаардык соту Кой-Таш окуялары боюнча иштеги өкүмдү жарым-жартылай өзгөрткөн, бирок 7 жыл 8 айлык мөөнөт күчүндө калтырылган.