Президент Садыр Жапаров «Мамлекеттик күзөт органынын Күжүрмөн туусу жана символикалык белгиси жөнүндө жобону бекитүү тууралуу» жарлыкка кол койду.

Документке ылайык, мамлекеттик күзөт органынын Күжүрмөн туусу жана аны тапшыруу жөнүндө президенттин грамотасы Кыргыз Республикасынын Куралдуу Күчтөрүнүн өзгөчө ардактуу белгилери болуп саналат. Алар мамлекеттик күзөт органына өткөрүлүп берилет.

Мамлекеттик күзөт органына жарлыкты ишке ашыруу үчүн зарыл чараларды көрүү тапшырылды.

Бекитилген жобо мамлекеттик күзөт органынын Күжүрмөн туусунун, символикалык белгисинин сыпаттамасын, ошондой эле аларды колдонуу тартибин аныктайт.

Күжүрмөн туу жана символикалык белги аскердик ар-намыстын, каармандыктын жана даңктын символу болуп саналат, ошондой эле мамлекеттик күзөт органынын аскер кызматчыларына каада-салттарды жана Ата Мекенди коргоо боюнча ыйык милдетти эске салып турат.

Жобого ылайык, Күжүрмөн туу алтын түстөгү чачылары бар кызыл түстөгү эки катмарлуу кездемеден турат. Анын алдыңкы бетинде Мамлекеттик күзөт кызматынын символикалык белгиси жана анын мамлекеттик тилдеги аталышы, ал эми арткы бетинде Кыргызстандын Мамлекеттик герби жайгашкан.

Символикалык белги мамлекеттик күзөт органынын расмий геральдикалык символу катары бекитилди. Анын негизин салттуу кыргыз калканы, күмүш түстөгү түндүк, кылычтар, лавр бутактары жана кызыл беш бурчтуу жылдыз түзөт. Сыпаттамага ылайык, бул элементтер мамлекетти коргоону, өлкөнүн биримдигин, аскердик каармандыкты, тартипти, ар-намысты, милдетке берилгендикти жана туруктуу күжүрмөн даярдыкты символдоштурат. 

Символиканын урааны: «Мамлекет кызматында — ар-намыс, Мекен коргоодо — калкан» деген идеяны чагылдырат.

Документ ошондой эле Күжүрмөн тууну сактоо жана колдонуу тартибин аныктайт. Ал Мамлекеттик күзөт кызматынын ыкчам нөөмөтчүсүнүн бөлмөсүндө гербдик мөөр менен бекитилген айнек капкактын астында сакталат жана салтанаттуу иш-чараларга гана чыгарылат.

Символикалык белгинин сүрөтү Мамлекеттик күзөт кызматынын аймагын жана имараттарын жасалгалоодо, расмий бланктарда жана басылмаларда, сыйлыктарда жана сувенирлерде, ошондой эле мекеме жетекчисинин чечими боюнча башка учурларда колдонулушу мүмкүн. 

Белгини ак-кара жана көлөмдүү варианттарда, ал эми чет өлкөлүк жарандардын катышуусундагы иш-чаралар үчүн англис тилиндеги текст менен колдонууга жол берилет.

Ошол эле учурда Күжүрмөн тууну башка мамлекеттик органдарга, юридикалык жана жеке жактарга колдонууга тыюу салынат. Аны мазактоого, ошондой эле анын маанисин бурмалаган жазууларды, белгилерди же сүрөттөрдү түшүрүүгө жол берилбейт. Мындай аракеттер үчүн кылмыш-жаза же жарандык-укуктук жоопкерчилик каралган.