Президент Садыр Жапаров Соода-деңизде сүзүү жөнүндө кодекске кол койду. Документ Кыргызстан деңизге чыга албаган мамлекет катары деңиз ташуулары жаатындагы мамилелерди жөнгө салуучу укуктук негизди түзөт. Бул тууралуу президенттин администрациясы билдирди.

Мыйзам долбоору Жогорку Кеңеште каралып жатканда өлкөнүн деңизге чыгуу мүмкүнчүлүгү жок экенине байланыштуу кеңири талкуу жараткан. Ошого карабастан, 2026-жылдын 24-июнунда парламент документти кабыл алган.

Кодекс соода-деңизде сүзүүнүн укуктук, экономикалык жана уюштуруучулук негиздерин аныктайт. Документ деңиз соодасын өнүктүрүүгө, өлкөнүн эл аралык аренадагы атаандаштыкка жөндөмдүүлүгүн жогорулатууга жана деңиз ишмердүүлүгүнүн катышуучуларынын укуктарын коргоого багытталган.

Президенттин администрациясы белгилегендей, Кыргызстан 2024-жылы Эл аралык деңиз уюму жөнүндө конвенцияга кошулган. Жаңы кодекс эл аралык укуктун жалпы таанылган принциптерине жана ченемдерине ылайык деңизге чыга албаган мамлекет катары өлкөнүн ачык деңизге чыгуу жана эркин соода-деңизде сүзүү укугун ишке ашырууга мүмкүндүк берет.

Кодекстин жоболору Кыргыз Республикасынын мамлекеттик желеги алдында сүзгөн деңиз кемелерине колдонулат. Ал эми Ысык-Көлдүн акваториясында жүргөн ички сүзүүчү кемелерге кодекстин тиешелүү жоболору гана колдонулуп, калган маселелер ички суу транспорту жөнүндө мыйзамдар менен жөнгө салынат.

Мындан тышкары, кодекс Кыргыз Республикасынын мамлекеттик менчигиндеги коммерциялык эмес кемелер эл аралык укукка ылайык кармоодон, камакка алуудан жана соттук куугунтуктоодон иммунитетке ээ болорун бекитет.

Кодекс аны күчүнө киргизүү жөнүндө мыйзам расмий жарыяланган күндөн тартып алты ай өткөндөн кийин күчүнө кирет.