Ооганстандын ар бир үчүнчү тургуну, башкача айтканда 14 миллионго жакын адам курч азык-түлүк тартыштыгына дуушар болууда. Ошол эле учурда эл аралык каржылоонун кыскарышынан улам БУУнун Дүйнөлүк азык-түлүк программасы (ДАП) жардамга муктаж ар тогуз адамдын бирине гана жардам көрсөтө алууда.

ДАПтын маалыматына ылайык, өлкөнүн 12 провинциясында балдардын курч жетишсиз тамактануусунун критикалык деңгээли катталды. Бул Ооганстанда буга чейин эч качан катталбаган эң жогорку көрсөткүч болуп саналат. Каатчылыктын негизги себептери катары жергиликтүү жаңжалдар, массалык жумушсуздук, азык-түлүккө болгон баанын өсүшү, гуманитардык каржылоонун азайышы жана жеткирүү жолдорундагы үзгүлтүктөр аталууда.

Өлкөгө Пакистан менен Ирандан дээрлик алты миллион оогандын мажбурлап кайтарылышы да абалды оорлотту. ДАПтын Ооганстан боюнча директору Жон Эйлиффтин айтымында, өлкөнүн экономикасы кайтып келгендердин баарын жумуш менен камсыздай албайт, ал эми соодадагы үзгүлтүктөр негизги азык-түлүккө болгон баанын 20–30 пайызга кымбатташына алып келди.

Балдардын жетишсиз тамактануусу өзгөчө кооптуу деңгээлге жетти. ДАПтын маалыматы боюнча, медициналык борборлорго жеткирилген балдардын саны тездик менен өсүүдө, алардын 80 пайызы эки жашка чейинкилер. Көпчүлүгү дарыгерлерге өтө кеч жеткирилүүдө.

Уюмдун маалыматына ылайык, гуманитардык каржылоонун кыскарышы курч жетишсиз тамактануудан жапа чеккен миллиондогон балдарды жардамсыз калтырууда. Ал эми жетишсиз тамактануунун алдын алуу үчүн атайын азык-түлүктөрдү таратуу 2025-жылдын май айында толугу менен токтотулган.

ДАПтын эсебинде, 2026-жылы Ооганстандагы шашылыш азык-түлүк жардамын көрсөтүү программаларын ишке ашыруу үчүн болжол менен 900 миллион доллар талап кылынат. Анын 500 миллион доллары азыркыга чейин түшө элек.